Yurtimizda yetishtirilgan paxta xom ashyosidan tayyorlangan trikotaj mahsulotlari bugun jahon bozorini zabt etmoqda. “O‘zsanoatqurilishbank” tomonidan Farg‘ona viloyatida o‘tkazilgan press-turda jurnalistlar yirik paxta-to‘qimachilik klasteri – “Fergana global textile” faoliyati bilan tanishish chog‘ida bu fikrlarga to‘liq ishonch hosil qildi.
Gap shundaki, Prezidentimiz raisligida joriy yilning 7 noyabr kuni mahalliy sanoatni rivojlantirish masalalari bo‘yicha o‘tkazilgan videoselektor yig‘ilishida mutasaddilarga mamlakatimizda to‘qimachilik tarmog‘ini yangicha sur’atda rivojlantirish, kelgusi yilda 5 milliard dollarlikdan ziyod eksportni amalga oshirish bo‘yicha topshiriqlar berilgan edi. Shu bilan birga, Yevropa davlatlari, jumladan, Turkiya, Misr, Marokashga gazlama va trikotaj mato eksporti uchun transport xarajatlarining 70 foizi qoplab berilishi ta’kidlangan edi. Bu, o‘z navbatida yirik eksportyor – “Fergana global textile” kabi korxonalar uchun keng imkoniyatlar eshigini ochib berdi.
– Albatta, biz tadbirkorlar sohaga oid har bir islohotdan katta manfaat ko‘ramiz, qulayliklar, imtiyozlardan ruhlanib, yangi ishlarga qo‘l uramiz, – deydi “Fergana global textile” mas’uliyati cheklangan jamiyati rahbari Mo‘minjon Razzoqov. – Korxonamizning klaster darajasiga chiqishi ham hukumatimiz tomonidan sohaning qo‘llab-quvvatlovi ostida yuzaga keldi. Maqsadimiz yuqori malakali mutaxassislar va zamonaviy texnologiyalarga tayanib, sifatli mahsulot hamda benuqson xizmatimiz bilan jahon to‘qimachilik bozorida yetakchilikni qo‘lga kiritishga qaratilgan. Korxona dastavval to‘qimachilik fabrikasi tarzida tashkil etilgan. Hudud fermerlaridan paxta tolasi sotib olinib, uni yigirish, bo‘yash va to‘qish bilan shug‘ullangan. bugungi kunda fabrika yirik klasterga aylandi. U yerda 1000 ga yaqin hudud aholisi ish bilan ta’minlandi. 13 ming gektardan ziyod paxta yetishtirish maydoni, paxta tozalash, tolani yigirish, bo‘yash va to‘qish zavodlari, shuningdek, laboratoriya hamda standartlashtirish markazlari mavjud.
– “Fergana global textile” viloyatdagi eng istiqbolli korxonalardan biri, – deydi “O‘zsanoatqurilishbank”ning Farg‘ona mintaqaviy bank xizmatlari ofisi boshlig‘i Baxtiyor Nuritdinov. – Tashkil etilganidan buyon bankimiz bilan hamkorlikda 4 ta loyiha amalga oshirildi. Dastlabki ikkita loyiha bo‘yicha xorijiy kredit liniyasi hisobidan Shveysariya, Germaniya, Italiya, Turkiya davlatlaridan ilg‘or to‘qimachilik dastgohlari hamda texnologiyalar olib kelishga ko‘maklashildi. Joriy yil boshidan buyon esa yana ikki marta kredit chiqarilib, paxta xom ashyosini yetishtirish bilan bog‘liq xarajatlari moliyaviy qo‘llab-quvvatlandi. Ayni paytda klaster tomonidan bir yig‘im-terim mavsumida 40 ming tonnadan ziyodroq hosil olinmoqda. Yigiruv fabrikasida kuniga 35 tonna, trikotaj matolar bo‘yicha 20 tonna, bo‘yash sexida esa 30 tonna mahsulotlar ishlab chiqarilmoqda. Eksport geografiyasi Italiya, Ispaniya, Germaniya, Portugaliya, Marokash, Turkiya, Xitoy, Polsha, Misr, BAA, Bangladesh, Moldova, Pokiston hamda MDH davlatlarini o‘z ichiga oladi. Bu boradagi ko‘rsatkich joriy yilning 1 dekabr holatiga ko‘ra, 45 million AQSH dollaridan ortdi.
Press-tur davomida jurnalistlar to‘qimachilik sanoati majmuasidagi uch toifada ishlab chiqarilayotgan turli iplar, bo‘yalgan trikotaj va bosma mato mahsulotlari xususiyatlari haqida mutaxassislardan batafsil ma’lumot oldi. Joriy yilning 1 dekabr holatiga ko‘ra, bankning Farg‘ona mintaqaviy bank xizmatlari ofisi tomonidan yuridik va jismoniy shaxslarga ko‘rsatilgan xizmatlar o‘tgan yilning shu davriga nisbatan 2 baravarga o‘sgan. 55 ta loyihani moliyalashtirish maqsadida 510,3 milliard so‘m miqdorida kredit ajratilgan. Buning hisobiga 360dan ziyod ish o‘rni yaratilgan.
M.Sulaymonov, M.Qodirov (surat), O‘zA.